ઇફ્કો કલોલ પ્લાન્ટના ૫૦ વર્ષ પૂર્ણ થવાના અવસરે યોજાયેલા સુવર્ણ જયંતિ મહોત્સવ અને બીજ સંશોધન કેન્દ્રના શિલાન્યાસ સમારોહમાં કેન્દ્રીય ગૃહ અને સહકાર મંત્રી અમિત શાહે જણાવ્યું હતું કે, ગુજરાતની સહકારી ચળવળની આગેવાની લેનાર ગુજરાત સહકારથી સમૃદ્ધિ તરફ આગળ વધી રહ્યું છે. તેના મૂળમાં ગુજરાતની આગવી સૂઝબૂઝ ધરાવતી સહકારી પ્રવૃત્તિ અને ઈફ્કો છે. સરદાર વલ્લભભાઈ પટેલ, ત્રિભુવનદાસ પટેલ, ઉદયભાણ સિંહજી અને વૈકુંઠ મહેતાના સમયથી કાર્યરત ગુજરાતની સહકારીતા મૂલ્યોનું સંવર્ધન અને સહકારીતાના મૂળને મજબૂત કરવાનું કામ દેશના પ્રધાનમંત્રી કરી રહ્યા છે, જેનો શ્રેય ગુજરાતને ફાળે જાય છે. રાજ્યના મુખ્યમંત્રી ભૂપેન્દ્ર પટેલે જણાવ્યું હતું કે, સરકાર પણ સહકાર સાથે સમર્પણ ભાવથી કામ કરી રહી છે. રાજ્યના વિકાસમાં આ બંને ક્ષેત્રના આદાન-પ્રદાનથી અસરકારક પરિણામો મેળવી રહ્યા છીએ. ઇફ્કોના ચેરમેન દિલીપભાઈ સંઘાણીએ જણાવ્યું હતું કે, કલોલ હવે માત્ર ખાતર ઉત્પાદનના નામ સાથે જોડાયેલું નહીં રહે, પરંતુ બીજ સંશોધન કેન્દ્રમાં પણ કાઠું કાઢશે અને તે પ્રવૃત્તિમાં પણ અગ્રેસર ભૂમિકા ભજવશે. તેમણે ત્રિભુવનદાસ પટેલની સહકારી મંથાઓને ગુજરાતની ભૂમિના માધ્યમથી સમગ્ર દેશમાં પ્રસરાવવાની વાત કરી હતી. આ કાર્યક્રમમાં કૃષિ મંત્રી રાઘવજીભાઈ પટેલ, સહકાર મંત્રી જગદીશભાઈ વિશ્વકર્મા, ઇફ્કોના એમડી ડો. ઉદયશંકર અવસ્થી, સાંસદ હરિભાઈ પટેલ, મયંકભાઈ નાયક, ધારાસભ્ય લક્ષ્મણજી ઠાકોર સહિતના મહાનુભાવો, સહકારી અગ્રણીઓ, સહકારી મંડળીના પ્રતિનિધિઓ અને વિશાળ જનસમુદાય ઉપસ્થિત રહ્યો હતો.
