ગુજરાત એટીએસ અને પલવલ એસટીએફે ગયા રવિવારે સંયુક્ત ઓપરેશનમાં ફરીદાબાદથી એક આતંકવાદીની ધરપકડ કરી હતી. સૂત્રોના જણાવ્યા અનુસાર, શંકાસ્પદ આતંકવાદીએ મોટો ખુલાસો કર્યો છે કે રામ મંદિર તેનું નિશાન હતું. ધરપકડ કરાયેલ વ્યક્તિનું નામ અબ્દુલ રહેમાન છે અને તેની પાસેથી બે હેન્ડગ્રેનેડ પણ મળી આવ્યા છે.
અબ્દુલ રહેમાન યુપીના ફૈઝાબાદનો રહેવાસી છે. તેના આતંકવાદી જોડાણો અંગે તેની સતત પૂછપરછ કરવામાં આવી રહી છે. પ્રાથમિક તપાસમાં અબ્દુલ રહેમાને ખુલાસો કર્યો છે કે તે ફૈઝાબાદથી ટ્રેન દ્વારા ફરીદાબાદ આવ્યો હતો અને ફરીદાબાદમાં જ કોઈ અજાણ્યા વ્યક્તિએ તેને ગામ પાસે ૨ હેન્ડગ્રેનેડ આપ્યા હતા. હેન્ડલરે પોતે તેને ફરીદાબાદમાં રહેવા કહ્યું હતું. કોર્ટે આરોપીના ૧૦ દિવસના રિમાન્ડ હરિયાણા એસટીએફને આપ્યા છે.
શંકાસ્પદ આતંકવાદી અબ્દુલ રહેમાને પૂછપરછ દરમિયાન મોટો ખુલાસો કર્યો છે. તે ૧૦ મહિના પહેલા આઇએસઆઇના ઇસ્લામિક સ્ટેટ ખોરાસન પ્રાંત મોડ્યુલમાં જોડાયો હતો. અબ્દુલ રહેમાનને ઓનલાઈન વિડીયો કોલ પર તાલીમ આપવામાં આવી હતી. અબ્દુલ રહેમાન મિલ્કીપુરમાં પોતાની દુકાન પર બેસીને વીડિયો કોલ પર તાલીમ લેતા હતા.
અબ્દુલ રહેમાને ફક્ત ૧૦મા ધોરણ સુધી જ અભ્યાસ કર્યો છે. તે મિલ્કીપુરમાં તેની દુકાન પર બેસીને વીડિયો કોલ પર તાલીમ લેતો હતો. તાલીમ દરમિયાન, અબ્દુલ રહેમાનને ઘણા કાર્યો પણ સોંપવામાં આવ્યા હતા. રામ મંદિરને ઉડાવી દેવાનું કાવતરું પણ વીડિયો કોલ પર ઘડવામાં આવ્યું હતું. અબ્દુલ રહેમાનના મોબાઈલમાંથી ઘણા ધાર્મિક સ્થળોના ફોટા અને વીડિયો મળી આવ્યા છે. તે પોતાના પરિવારને કહીને ઘરેથી નીકળ્યો હતો કે તે દિલ્હીના મરકઝ જઈ રહ્યો છે. મળતી માહિતી મુજબ, અબ્દુલ રહેમાન માત્ર ૫ દિવસ પહેલા જ પોતાના ઘરેથી ફરીદાબાદ જવા નીકળ્યો હતો.
