સહકારી ક્ષેત્રના વિકાસ અને નવા ઉદ્યોગસાહસિકોને પ્રોત્સાહન આપવાના હેતુથી નવી દિલ્હી ખાતે એક મહત્વપૂર્ણ બેઠક યોજાઈ હતી. વર્ષ ૨૦૨૫ને સહકારી વર્ષ તરીકે ઘોષિત કરવામાં આવ્યું છે, જેના ભાગરૂપે ઈફકોના ચેરમેન દિલીપભાઈ સંઘાણીએ કેન્દ્રીય મંત્રી મનસુખભાઈ માંડવીયા અને ઉત્તરાખંડના મુખ્યમંત્રી પુષ્કર ધામી સાથે શુભેચ્છા મુલાકાત કરી હતી. બેઠક દરમિયાન સહકારી ક્ષેત્રના વિકાસ માટે વિવિધ મુદ્દાઓ પર ચર્ચા કરવામાં આવી હતી. ખાસ કરીને નાના અને ઉભરતા ઉદ્યોગસાહસિકોને સહકારી ક્ષેત્ર દ્વારા મળતા સહયોગને વધુ મજબૂત બનાવવા પર ભાર મૂકવામાં આવ્યો હતો. આ ઉપરાંત, દેશ અને રાજ્ય સ્તરે સહકારી પ્રવૃત્તિઓને વેગ આપવા અને આર્થિક ક્ષેત્રે તેની ભૂમિકાને વધુ મજબૂત બનાવવા અંગે પણ વિચાર-વિમર્શ કરવામાં આવ્યો હતો. કેન્દ્રીય મંત્રી માંડવીયા અને મુખ્યમંત્રી ધામીએ સહકારી ક્ષેત્રને વધુ કાર્યક્ષમ અને લોકભોગ્ય બનાવવા માટે સહયોગ આપવાની ખાતરી આપી હતી. સહકારી વર્ષની ઉજવણી દરમિયાન વિવિધ કાર્યક્રમો અને
પ્રવૃત્તિઓ યોજવામાં આવશે, જેના માધ્યમથી સહકારી આંદોલનને વધુ મજબૂત બનાવવાનો પ્રયાસ કરવામાં આવશે.
