ઉત્તર કોરિયાએ ફરી એકવાર સુપર લાર્જ વોરહેડ ક્રૂઝ મિસાઈલ અને એન્ટી એરક્રાફ્ટ મિસાઈલનું પરીક્ષણ કરીને દુનિયાને ચોંકાવી દીધી છે. સમગ્ર વિશ્વમાં ત્રીજા વિશ્વયુદ્ધનો ખતરો અને રશિયા-યુક્રેન યુદ્ધ, ઈઝરાયેલ-હમાસ અને ઈઝરાયેલ-ઈરાન યુદ્ધ વચ્ચે ઉત્તર કોરિયાનું આ પરીક્ષણ સમગ્ર વિશ્વને એક મોટો સંદેશ આપવા જઈ રહ્યું છે. ઉત્તર કોરિયાએ કહ્યું હતું કે તેણે તેના પશ્ચિમી દરિયાકાંઠાના વિસ્તારમાં એક ‘અત્યંત વિશાળ’ ક્રુઝ મિસાઈલ વોરહેડ અને એન્ટી એરક્રાફ્ટ મિસાઈલનું પરીક્ષણ કર્યું છે.
ઉત્તર કોરિયાના નેતા કિમ જાંગ ઉન પોતાની સૈન્ય અને લડાયક ક્ષમતામાં સતત વધારો કરી રહ્યા છે. ખાસ કરીને અમેરિકા અને દક્ષિણ કોરિયા સાથે વધતા તણાવ વચ્ચે ઉત્તર કોરિયા તેની સૈન્ય ક્ષમતામાં ઝડપથી વધારો કરી રહ્યું છે અને તેણે તાજેતરમાં અનેક મિસાઈલ પરીક્ષણો કર્યા છે. ઉત્તર કોરિયાના રાજ્ય મીડિયાએ એક સમાચારમાં જણાવ્યું હતું કે શુક્રવારે ‘હવાસલ-૧ રા-૩’ વ્યૂહાત્મક ક્રુઝ મિસાઈલ તેમજ ‘પ્યોલજી-૧-૨’ એન્ટી એરક્રાફ્ટ મિસાઈલ માટે તૈયાર કરવામાં આવેલા વોરહેડનું ‘પાવર ટેસ્ટ’ કરવામાં આવ્યું હતું. નું પરીક્ષણ કરવામાં આવ્યું હતું. ઉત્તર કોરિયાની રાજ્ય સંચાલિત કોરિયન સેન્ટ્રલ ન્યૂઝ એજન્સી દ્વારા જાહેર કરાયેલા ચિત્રોમાં ઓછામાં ઓછી બે મિસાઈલો લોન્ચર ટ્રકમાંથી છોડવામાં આવી રહી છે.
અહેવાલમાં જણાવાયું છે કે પરીક્ષણો દેશની સૈન્ય વિકાસ પ્રવૃત્તિઓનો એક ભાગ છે અને તેને “આસપાસની પરિસ્થિતિ” સાથે કોઈ લેવાદેવા નથી. તાજેતરના વર્ષોમાં કોરિયન દ્વીપકલ્પ પર ઘણો તણાવ છે. ઉત્તર કોરિયાના નેતા કિમ જાંગ ઉન દેશના હથિયારોનો ભંડાર વધારવા માટે સતત પ્રયાસ કરી રહ્યા છે અને તેમનું કહેવું છે કે આ ભંડારમાં કેટલીક એવી મિસાઈલો પણ સામેલ છે જે અમેરિકન મેઈનલેન્ડ અને પેસિફિક ક્ષેત્રમાં અમેરિકન લક્ષ્યોને નિશાન બનાવવામાં સક્ષમ છે. ઉત્તર કોરિયાની તૈયારીઓ વચ્ચે અમેરિકા, દક્ષિણ કોરિયા અને જાપાને તેમની સંયુક્ત સૈન્ય તાલીમનો વિસ્તાર કર્યો છે અને તેમની સંરક્ષણ વ્યૂહરચનાઓમાં વધારો કર્યો છે.
