કેન્દ્ર સરકારે હિમાચલ સરકારને પત્ર લખીને કર્મચારીઓને યુનિફાઇડ પેન્શન સ્કીમ (યુપીએસ) લાગુ કરવા જણાવ્યું છે. જો આમ કરવામાં આવશે તો કેન્દ્ર સરકાર હિમાચલને ૧૬૦૦ કરોડ રૂપિયાની વિશેષ સહાય આપશે.
કેન્દ્ર દ્વારા જારી કરાયેલા પત્ર અનુસાર, વર્ષ ૨૦૨૨-૨૩ અને ૨૦૨૩-૨૪માં કરાર પર નિયુક્ત સરકારી કર્મચારીઓને યુપીએસમાં લાવવાથી ફાયદો થશે. જા કે રાજ્ય સરકારે હજુ સુધી આ પત્ર અંગે કોઈ જવાબ આપ્યો નથી. ઉલ્લેખનીય છે કે રાજ્ય સરકારે હિમાચલમાં જૂની પેન્શન યોજના લાગુ કરી છે. કેન્દ્રએ હિમાચલને ૯૦૦૦ કરોડ રૂપિયા આપવાના છે. આ રકમ કેન્દ્રમાં જમા કરાયેલ એનપીએસ કર્મચારીઓનો હિસ્સો છે. રાજ્ય સરકાર સતત આ મામલો કેન્દ્ર સમક્ષ ઉઠાવી રહી છે. આ બજેટ હજુ મળ્યું નથી.
રાજ્ય સરકારનું માનવું છે કે હિમાચલમાં જૂની પેન્શન યોજના લાગુ કરવા માટે કેન્દ્રએ રાજ્ય પર નાણાકીય નિયંત્રણો લાદ્યા છે. લોન લેવાની મર્યાદા ૬૬૦૦ કરોડ રૂપિયા નક્કી કરવામાં આવી છે. એટલું જ નહીં, બાહ્ય સહાયિત એજન્સીઓ દ્વારા નાણાકીય સહાય માટે નવી દરખાસ્તો માટે પણ મર્યાદા નક્કી કરવામાં આવી છે. હિમાચલ નાણાકીય વર્ષ ૨૦૨૫-૨૬ ના અંત સુધીમાં માત્ર રૂ. ૨,૯૪૪ કરોડ સુધીની દરખાસ્તોને મંજૂરી માટે પાત્ર હશે.
ચૂંટણી ગેરંટી પૂરી કરીને રાજ્ય સરકારે ૧.૩૬ લાખ સરકારી કર્મચારીઓને જૂનું પેન્શન પુનઃસ્થાપિત કર્યું છે. હવે જોવાનું એ રહે છે કે રાજ્ય સરકાર નવા કોન્ટ્રાક્ટ કર્મચારીઓને યુપીએસ હેઠળ લાવવાનો નિર્ણય લે છે કે પછી તેમને જૂનું પેન્શન જ આપવામાં આવશે.
