સંયુક્ત રાષ્ટ્ર (યુએન) એ ઇઝરાયલી સૈનિકો પર દક્ષિણ ગાઝામાં ૧૫ પેલેસ્ટીનિયન ડોકટરોની હત્યા કરવાનો આરોપ મૂકયો. યુએનએ દાવો કર્યો હતો કે બધા ડોકટરોની હત્યા કરવામાં આવી હતી અને તેમને સામૂહિક કબરમાં દફનાવવામાં આવ્યા હતા, જ્યાં ક્ષતિગ્રસ્ત એમ્બ્યુલન્સ પણ મળી આવી હતી. એવો આરોપ છે કે ઇઝરાયલી લશ્કરી બુલડોઝરોએ ડોકટરો અને એમ્બ્યુલન્સના મૃતદેહને કચડી નાખ્યા હતા. સંયુક્ત રાષ્ટ્રનું કહેવું છે કે ૧૮ મહિના પહેલા ગાઝામાં યુદ્ધ શરૂ થયું ત્યારથી, ઇઝરાયલે ૧૦૦ થી વધુ નાગરિક સંરક્ષણ કર્મચારીઓ અને ૧,૦૦૦ થી વધુ આરોગ્ય કર્મચારીઓને મારી નાખ્યા છે.
પેલેસ્ટીનિયનોના વિશાળ ટોળાએ ગાઝામાં નાસેર હોસ્પિટલની બહાર મૃત ડોકટરો અને કટોકટી કર્મચારીઓને દફનાવ્યા હતા. પેલેસ્ટીનિયન રેડ ક્રેસેન્ટે આરોપ લગાવ્યો હતો કે કામદારો અને તેમના વાહનો પર સ્પષ્ટપણે તબીબી નિશાનો હતા. આમ છતાં, ઇઝરાયલી સૈનિકોએ તેને નિર્દયતાથી મારી નાખ્યો. દરમિયાન, ઇઝરાયલી સેનાએ કહ્યું કે તેમણે અજાણ્યા “શંકાસ્પદ” વાહનો પર ગોળીબાર કર્યો.
મૃતકોમાં આઠ રેડ ક્રેસન્ટ કામદારો, ગાઝાના નાગરિક સુરક્ષા કટોકટી એકમના છ સભ્યો અને પેલેસ્ટીનિયનો માટે સંયુક્ત રાષ્ટ્ર એજન્સીના એક કર્મચારીનો સમાવેશ થાય છે. ઇન્ટરનેશનલ રેડ ક્રોસ/રેડ ક્રેસેન્ટે જણાવ્યું હતું કે આ આઠ વર્ષમાં તેના કર્મચારીઓ પરનો સૌથી ઘાતક હુમલો હતો.
ઇઝરાયલી દળોએ ૨૩ માર્ચે રફાહના તેલ અલ-સુલતાન જિલ્લામાં આક્રમણ શરૂ કર્યું. હુમલામાં ઘાયલ થયેલા લોકોને બહાર કાઢવા માટે બપોરના સુમારે કટોકટીની ટીમો પહોંચ્યા પછી તે ગુમ થઈ ગઈ હતી. જાકે, ઇઝરાયલી સૈન્યએ તે દિવસની શરૂઆતમાં જ આ વિસ્તાર ખાલી કરાવવાની હાકલ કરી હતી. સેનાએ કહ્યું હતું કે હમાસના આતંકવાદીઓ અહીં છુપાયેલા છે. તે જ સમયે, નાગરિક સંરક્ષણે તેના ચેતવણીમાં કહ્યું હતું કે વિસ્થાપિત પેલેસ્ટીનિયનોએ આ વિસ્તારમાં આશ્રય લીધો હતો, જેમના પર ઇઝરાયેલી સેના દ્વારા હુમલો કરવામાં આવ્યો હતો. જ્યારે ઇમરજન્સી ટીમ તેમને બચાવવા માટે ત્યાં પહોંચી ત્યારે ઇઝરાયલી સૈનિકોએ તેને પણ ઘેરી લીધું.
યુએનએ જણાવ્યું હતું કે ઇઝરાયલી દળોએ ૨૩ માર્ચે પહેલી ટીમને મારી નાખી હતી. જ્યારે અન્ય કટોકટી ટીમો પહેલી ટીમને બચાવવા માટે પહોંચી ત્યારે ઇઝરાયલી દળો દ્વારા તેમના પર ઘણા કલાકો સુધી હુમલો કરવામાં આવ્યો. તે જ સમયે, ઇઝરાયલી દળોનું કહેવું છે કે તેમણે કોઈપણ કટોકટી સંકેતો વિના શંકાસ્પદ રીતે તેમની તરફ આગળ વધી રહેલા વાહનો પર ગોળીબાર કર્યો. પ્રારંભિક મૂલ્યાંકન દર્શાવે છે કે સૈનિકોએ ત્યાં હમાસ કાર્યકર મોહમ્મદ અમીન શોબાકી અને અન્ય આઠ આતંકવાદીઓને મારી નાખ્યા હતા.
