ચેમ્પીયન્સ ટ્રોફી ૨૦૨૫ માં યોજાવાની છે. આ વખતે ટુર્નામેન્ટનું આયોજન પાકિસ્તાનના હાથમાં છે. ટીમ ઈન્ડીયા તેની બધી મેચ યુએઈમાં રમશે.ચેમ્પીયન્સ ટ્રોફી માટે ભારતીય ટીમની જાહેરાત હજુ સુધી કરવામાં આવી નથી. જોકે, એવું માનવામાં આવે છે કે ટીમની જાહેરાત ૧૯ જાન્યુઆરી સુધીમાં કરવામાં આવશે. ટીમ ઈન્ડીયા આ ટુર્નામેન્ટમાં પોતાની પહેલી મેચ ૨૦ ફેબ્રુઆરીએ રમશે. ચેમ્પીયન્સ ટ્રોફી શરૂ થાય તે પહેલા ટીમ ઈન્ડીયા સામે એક મોટી સમસ્યા ઉભી થઈ છે. આ સમસ્યાને ઠીક કરવા માટે, બીસીસીઆઇ એક મોટો નિર્ણય લેવા જઈ રહ્યું છે. જે અંતર્ગત ટીમ ઈન્ડીયાના કોચિંગ સ્ટાફમાં ફેરફાર જાઈ શકાય છે.
ભારતીય ક્રિકેટ ટીમે ઓસ્ટ્રેલિયાના તાજેતરના પ્રવાસ દરમિયાન બોલિંગમાં શાનદાર પ્રદર્શન કર્યું હતું, પરંતુ બેટિંગ ટીમ ઈન્ડીયા માટે ચિંતાનો વિષય રહ્યો. જેના કારણે ભારતીય ટીમને પણ હારનો સામનો કરવો પડ્યો. આ કારણોસર, બીસીસીઆઇ કોચિંગ સ્ટાફમાં એક નવો સભ્ય ઉમેરવાની શક્યતા ચકાસી રહ્યું છે, ખાસ કરીને બેટિંગ કોચ. જાકે બોર્ડ દ્વારા હજુ સુધી આ અંગે કોઈ સત્તાવાર જાહેરાત કરવામાં આવી નથી, પરંતુ બીસીસીઆઇ અને ટીમ મેનેજમેન્ટ વચ્ચેની ચર્ચાથી જાણવા મળ્યું છે કે કોચિંગ સ્ટાફને મજબૂત બનાવવાની ખૂબ જરૂર છે.
ક્રિકબઝના રિપોર્ટ મુજબ, બીસીસીઆઈ દ્વારા આ પદ માટે કેટલાક મોટા નામો પર વિચાર કરવામાં આવી રહ્યો છે. જેમાં ઘરેલુ ક્રિકેટના દિગ્ગજ બેટ્સમેનોનો સમાવેશ થાય છે. જાકે, કોઈપણ નામ અંગે અંતિમ નિર્ણય હજુ સુધી લેવાયો નથી. હાલમાં, ટીમ ઈન્ડીયાના કોચિંગ સ્ટાફમાં ગૌતમ ગંભીર (મુખ્ય કોચ), મોર્ને મોર્કેલ (બોલિંગ કોચ), અભિષેક નાયર (સહાયક કોચ), રાયન ટેન ડોશેટ (સહાયક કોચ) અને ટી દિલીપ (ફિલ્ડીંગ કોચ)નો સમાવેશ થાય છે. આવી સ્થિતિમાં, ટીમ ઈન્ડીયા બેટિંગ કોચની શોધમાં છે.
ચેમ્પીયન્સ ટ્રોફીને ધ્યાનમાં રાખીને, ટીમ ઈન્ડીયાની બેટિંગમાં શક્ય તેટલી વહેલી તકે સુધારો કરવાની જરૂર જણાય છે. જાકે, મોટાભાગના ચાહકોનું ધ્યાન રોહિત શર્મા અને વિરાટ કોહલીની નબળી બેટિંગ પર રહ્યું છે. આ બંને બેટ્સમેનોએ તેમના નામ મુજબ પ્રદર્શન કર્યું નથી. ઓસ્ટ્રેલિયા પ્રવાસમાં બંને બેટ્સમેન સંપૂર્ણપણે નિષ્ફળ રહ્યા હતા. કોચિંગ સ્ટાફે બીસીસીઆઈ સમક્ષ પોતાની માંગણીઓ રજૂ કરી છે. જાકે, એ સ્પષ્ટ નથી કે બીસીસીઆઇ નિમણૂક સાથે આગળ વધશે કે નહીં.
