વાયનાડથી પ્રિયંકા ગાંધીની જીત પર તેમના પતિ રોબર્ટ વાડ્રાએ ખુશી વ્યક્ત કરી હતી. તેણે પોતે પણ સાંસદ બનવાની ઈચ્છા વ્યક્ત કરી હતી. વાડ્રાએ કહ્યું કે જો દેશની જનતા ઈચ્છશે તો એક દિવસ તેઓ પણ સંસદમાં પહોંચશે. ઉલ્લેખનીય છે કે પ્રિયંકા ગાંધી આવતીકાલે એટલે કે ગુરુવારે સંસદમાં શપથ લેવા જઈ રહી છે. પ્રિયંકા ગાંધી કેરળના વાયનાડથી તાજેતરની પેટાચૂંટણી જીતીને સંસદ પહોંચ્યા છે.
મીડિયા સાથે વાત કરતા રોબર્ટ વાડ્રાએ કહ્યું કે ‘લોકોને વિશ્વાસ હતો કે પ્રિયંકા ગાંધી જંગી માર્જિનથી ચૂંટણી જીતશે. પ્રિયંકાને સમર્થન આપવા બદલ હું વાયનાડના લોકોનો આભાર માનું છું. હું હંમેશા ઈચ્છતો હતો કે પ્રિયંકા સંસદમાં પહોંચે અને આજે તે ભાગ્યશાળી દિવસ આવી ગયો છે. લોકો ખૂબ ખુશ છે અને તેઓ માને છે કે તે તેમના અધિકારો માટે લડશે. તે રાહુલ અને પાર્ટીને સંસદમાં મદદ કરશે. રોબર્ટ વાડ્રાએ પોતે ચૂંટણીની રાજનીતિમાં આવવાનો ઈરાદો વ્યક્ત કર્યો અને કહ્યું કે, ‘જો લોકોને લાગે છે કે હંર પણ પરિવર્તન લાવી શકીશ તો કદાચ એક દિવસ હું સંસદમાં પણ પહોંચીશ.’
વાયનાડ કોંગ્રેસના નેતાઓએ બુધવારે પ્રિયંકા ગાંધીને વાયનાડ સંસદીય બેઠક પરથી જીતનું ચૂંટણી પ્રમાણપત્ર સોંપ્યું. પ્રિયંકા ગાંધી ગુરુવારે સાંસદ તરીકે શપથ લઈ શકે છે. ચૂંટણી પ્રમાણપત્ર પ્રાપ્ત કરવાના પ્રસંગે રાહુલ ગાંધી પ્રિયંકા ગાંધીને મીઠાઈ ખવડાવતા જોવા મળ્યા હતા. પ્રિયંકા ગાંધીએ વાયનાડના લોકોના અપાર સમર્થન અને વિશ્વાસ બદલ તેમનો હૃદયપૂર્વક આભાર વ્યક્ત કર્યો હતો. તેમણે ચૂંટણી દરમિયાન કોંગ્રેસના નેતાઓના અથાક પ્રયાસો માટે તેમની પ્રશંસા પણ કરી હતી. પ્રિયંકા ગાંધીએ વાયનાડ લોકસભા પેટાચૂંટણીમાં ચાર લાખથી વધુ મતોના જંગી માર્જિનથી જીત મેળવી છે, જે ૨૦૨૪ની લોકસભા ચૂંટણીમાં તેમના ભાઈ રાહુલ ગાંધીની જીતના માર્જિન કરતાં પણ વધુ છે.
