પાટણ જિલ્લાના હારીજ તાલુકાની રાજપુરા મુખ્ય બ્રાન્ચ કેનાલમાં નર્મદા વિભાગની ઘોર બેદરકારી સામે આવી છે. સ્થાનિક ખેડૂતો દ્વારા કેનાલમાં સફાઈના નામે ભ્રષ્ટાચાર થતો હોવાનો ગંભીર આક્ષેપ કરવામાં આવ્યો છે. કેનાલની સફાઈ માત્ર કાગળ પર જ થઈ હોવાના દ્રશ્યો સામે આવ્યા છે, જેના કારણે ખેડૂતોમાં ભારે રોષ જોવા મળી રહ્યો છે.
મળતી માહિતી અનુસાર, રાજપુરા બ્રાન્ચની આશરે ૮ કિલોમીટર લાંબી કેનાલમાં સફાઈનો સદંતર અભાવ જોવા મળી રહ્યો છે. કેનાલમાં ચાલુ પાણી હોવા છતાં લીલ અને ગંદકીનું સામ્રાજ્ય જોવા મળી રહ્યું છે, જે પાણીના પ્રવાહને અવરોધી રહ્યું છે. એટલું જ નહીં, કેનાલની દીવાલ પાસે મોટું ગાબડું પડી ગયું છે, જેના કારણે અકસ્માત થવાનો ભય પણ સેવાઈ રહ્યો છે.
સ્થાનિક ખેડૂતો ચતુરભાઈ પટેલે આક્ષેપ કર્યો છે કે સફાઈ કરતી એજન્સી અને નર્મદા વિભાગના અધિકારીઓની મિલીભગતને કારણે આ ભ્રષ્ટાચાર આચરવામાં આવી રહ્યો છે. તેમણે જણાવ્યું કે મુખ્ય કેનાલ હારીજ, સમી અને શંખેશ્વર તાલુકાઓને પાણી પૂરું પાડે છે, પરંતુ સફાઈના અભાવે ખેડૂતોને સિંચાઈ માટે પૂરતું પાણી મળી રહ્યું નથી.
ખેડૂતોએ માંગણી કરી છે કે તાત્કાલિક ધોરણે કેનાલની યોગ્ય સફાઈ કરવામાં આવે અને ભ્રષ્ટાચાર કરનારા અધિકારીઓ અને એજન્સી સામે કડક કાર્યવાહી કરવામાં આવે. જો આ દિશામાં તાત્કાલિક પગલાં લેવામાં નહીં આવે તો ખેડૂતો આંદોલન કરવાની ચીમકી ઉચ્ચારી રહ્યા છે. આ ઘટના તંત્રની કામગીરી પર ગંભીર સવાલો ઉભા કરે છે અને સફાઈના નામે થતા ભ્રષ્ટાચારને ઉજાગર કરે છે. તંત્ર દ્વારા આ મામલે શું કાર્યવાહી કરવામાં આવે છે તે જોવાનું રહેશે.
