નવા વર્ષની શરૂઆત થોડા જ દિવસોમાં થવા જઈ રહી છે. નવું વર્ષ લોકોના જીવનમાં નવી ખુશીઓ અને ઉત્સાહ લઈને આવે છે. નવા વર્ષમાં એટલે કે ૨૦૨૫ માં, સૂર્ય, પૃથ્વી અને ચંદ્રની ગતિ વિશ્વને બે સૂર્યગ્રહણ અને બે ચંદ્રગ્રહણના રોમાંચક દ્રશ્યો બતાવશે. જો કે, ઉજ્જૈનની પ્રતિષ્ઠિત વેધશાળાની આ આગાહી ભારતના ખગોળશાસ્ત્ર પ્રેમીઓને નિરાશ કરી શકે છે કે આમાંથી માત્ર એક જ ગ્રહણ દેશમાં દેખાશે.
સરકારી જીવાજી વેધશાળાના અધિક્ષક ડા. રાજેન્દ્ર પ્રકાશ ગુપ્તાએ જણાવ્યું હતું કે નવા વર્ષમાં ગ્રહણની શ્રેણી ૧૪ માર્ચે પૂર્ણ ચંદ્રગ્રહણ સાથે શરૂ થશે. ગુપ્તાએ કહ્યું, ‘નવા વર્ષનું આ પ્રથમ ગ્રહણ ભારતમાં જોવા મળશે નહીં, કારણ કે આ ખગોળીય ઘટના સમયે દેશમાં દિવસનો સમય હશે. આ ખગોળીય ઘટના અમેરિકા, પશ્ચિમ યુરોપ, પશ્ચિમ આફ્રિકા અને ઉત્તર અને દક્ષિણ એટલાન્ટીક મહાસાગરમાં જોવા મળશે.
જીવાજી વેધશાળાના અધિક્ષક ડો. ગુપ્તાએ જણાવ્યું હતું કે ૨૯ માર્ચે થનારું આંશિક સૂર્યગ્રહણ ભારતમાં દેખાશે નહીં. આ ગ્રહણ ઉત્તર અમેરિકા, ગ્રીનલેન્ડ, આઇસ લેન્ડ, ઉત્તર એટલાન્ટીક મહાસાગર, સમગ્ર યુરોપ અને ઉત્તર-પશ્ચિમ રશિયામાં દેખાશે.
તેમણે કહ્યું, ‘ભારતીય ખગોળશાસ્ત્ર પ્રેમીઓ એ હકીકતથી ઉત્સાહિત થઈ શકે છે કે વર્ષ ૨૦૨૫ માં, ૭ થી ૮ સપ્ટેમ્બરની વચ્ચે થનારું સંપૂર્ણ ચંદ્રગ્રહણ દેશમાં જોઈ શકાશે. આ ગ્રહણ એશિયાના અન્ય દેશો તેમજ યુરોપ, એન્ટાર્કટિકા, પશ્ચિમ પ્રશાંત મહાસાગર, ઓસ્ટ્રેલિયા અને હિંદ મહાસાગર ક્ષેત્રમાં દેખાશે.
ગુપ્તાએ કહ્યું કે ૨૦૨૫નું છેલ્લું ગ્રહણ ૨૧ અને ૨૨ સપ્ટેમ્બરની વચ્ચે આંશિક સૂર્યગ્રહણ તરીકે થશે અને આ ખગોળીય ઘટના ભારતમાં દેખાશે નહીં. તેમણે કહ્યું, ‘આ આંશિક સૂર્યગ્રહણ ન્યુઝીલેન્ડ, ઈસ્ટર્ન મેલેનેશિયા, સધર્ન પોલિનેશિયા અને વેસ્ટ એન્ટાર્કટિકામાં જોવા મળશે.’
તમને જણાવી દઈએ કે વર્ષ ૨૦૨૪, જે ટૂંક સમયમાં સમાપ્ત થવા જઈ રહ્યું છે, તેમાં પેનમ્બ્રલ ચંદ્રગ્રહણ, સંપૂર્ણ સૂર્યગ્રહણ, આંશિક ચંદ્રગ્રહણ અને વલયાકાર સૂર્યગ્રહણની ચાર ખગોળીય ઘટનાઓ જોવા મળી હતી.
