અમરેલી શહેરની ટ્રાફિક વ્યવસ્થાને સુધારવા માટે રૂ.૨૭૦.૨૬ કરોડના ખર્ચે નવો ચારમાર્ગીય બાયપાસ મંજૂર કરવામાં આવ્યો છે. આ બાયપાસ નાના માચિયાળાથી રાધેશ્યામ ચોકડી સુધીના ૧૨ કિ.મી. વિસ્તારને કવર કરશે, જે અમરેલી-બાબરા, અમરેલી-લાઠી, અમરેલી-સાવરકુંડલા અને અમરેલી-બગસરા જેવા મુખ્ય માર્ગોને જોડશે. હાલમાં, રાજકોટ, અમદાવાદ, બાબરા-લાઠી, સાવરકુંડલા, બગસરા, જૂનાગઢ-ધારી-તુલસીશ્યામ તરફથી આવતા વાહનો હયાત બાયપાસનો ઉપયોગ કરી શકે છે, પરંતુ રાજકોટથી કુંકાવાવ જતા વાહન વ્યવહાર માટે બાયપાસની સુવિધા ઉપલબ્ધ નથી. નવા બાયપાસ માટે જમીન સંપાદનની પ્રક્રિયા પૂર્ણ થવાના આરે છે અને ડી.પી.આર. (વિગતવાર પ્રોજેક્ટ રિપોર્ટ) તૈયાર કરવાની કામગીરી પ્રગતિમાં છે. આ ચારમાર્ગીય બાયપાસના નિર્માણથી શહેરના ટ્રાફિક દબાણમાં ઘટાડો થશે અને વાહનચાલકો માટે વધુ સુગમ અને સુરક્ષિત માર્ગ ઉપલબ્ધ થશે. અમરેલી માર્ગ અને મકાન (રાજ્ય) વિભાગે આ બાયપાસના વિકાસ અંગે એક સત્તાવાર જાહેરાત કરી છે.
