આસામ બાદ હવે બિહારમાં પણ બીફ પર પ્રતિબંધ મૂકવાની માંગ ઉઠી છે. મુખ્યમંત્રી નીતિશ કુમારના રાજદ સાંસદ દિલેશ્વર કામૈતે કહ્યું કે બિહારમાં બીફ પર પ્રતિબંધ લગાવવો જોઈએ. આસામ સરકારે યોગ્ય નિર્ણય લીધો છે. દિલેશ્વર કામૈત લોકસભામાં જદયુ સંસદીય દળના નેતા છે.આ પહેલા બીજેપી સાંસદ ગિરિરાજ સિંહે પણ બીફને લઈને નિવેદન આપ્યું હતું. તેમણે કહ્યું હતું કે નેહરુ તમામ મુસીબતનું મૂળ છે. જો નેહરુએ ભારતમાં ગૌહત્યા પર પ્રતિબંધ મૂક્યો હોત તો આજે આ સ્થિતિ સર્જાઈ ન હોત.
આસામના મુખ્યમંત્રી હિમંતા વિશ્વ શર્માએ જાહેરાત કરી કે રાજ્ય સરકારે રેસ્ટોરાં, હોટલ અને જાહેર સ્થળોએ બીફ પીરસવા અને ખાવા પર પ્રતિબંધ મૂકવાનો નિર્ણય લીધો છે. રાજ્ય કેબિનેટની બેઠકમાં આ અંગે પ્રવર્તમાન કાયદામાં સુધારો કરીને નવી જાગવાઈઓનો સમાવેશ કરવાનો નિર્ણય લેવાયો હતો. તેમણે કહ્યું કે બીફના સેવન અંગેનો વર્તમાન કાયદો કડક છે, પરંતુ રેસ્ટોરાં, હોટલ અને ધાર્મિક કે સામાજિક મેળાવડાઓમાં બીફ ખાવા પર હજુ સુધી કોઈ પ્રતિબંધ નથી. મુખ્યમંત્રીએ કહ્યું કે, હવે અમે આસામમાં જાહેર સ્થળોએ પણ બીફના સેવન પર સંપૂર્ણ પ્રતિબંધ લાદવા માટે કાયદો વધુ કડક બનાવવાનો નિર્ણય લીધો છે.
આસામમાં ગૌમાંસનું સેવન ગેરકાયદેસર નથી, પરંતુ આસામ કેટલ પ્રિઝર્વેશન એક્ટ ૨૦૨૧ એ વિસ્તારોમાં જ્યાં હિન્દુ, જૈન અને શીખ બહુમતી છે અને મંદિરની પાંચ કિલોમીટરની અંદર પશુઓની કતલ અને ગૌમાંસના વેચાણ પર પ્રતિબંધ મૂકે છે. આ પ્રતિબંધ હવે રાજ્યભરમાં હોટલ, રેસ્ટોરન્ટ અને જાહેર સ્થળો પર લાદવામાં આવ્યો છે.
વિપક્ષ આસામ સરકારના નિર્ણયનો વિરોધ કરી રહ્યો છે. શિવસેના (યુબીટી)ના નેતા સંજય રાઉતે કહ્યું કે આરએસએસના અગ્રણી નેતાઓએ પણ અગાઉ કહ્યું છે કે ખાવું-પીવું એ વ્યક્તિગત બાબત છે. ગોવામાં ગૌમાંસ પર પ્રતિબંધ કેમ નથી? તે ઉત્તર પૂર્વમાં કેમ નથી?
ભાજપના પ્રવક્તા શહેઝાદ પૂનાવાલાએ વિપક્ષના હુમલાનો જવાબ આપ્યો છે. તેમણે ‘વોટ બેંકની રાજનીતિ’ માટે આ પ્રતિબંધનો વિરોધ કરવા બદલ કોંગ્રેસના ઘણા નેતાઓ પર સવાલ ઉઠાવ્યા છે. શહેઝાદ પૂનાવાલાએ આસામમાં હિન્દુઓની પરવા ન કરવા બદલ કોંગ્રેસ પર પ્રહારો કર્યા છે
