ગુજરાત વિધાનસભાની કડી અને વિસાવદર વિધાનસભા બેઠકો માટે પેટા ચૂંટણી યોજાવાના સંકેત મળી રહ્યા છે. કેન્દ્રીય ચૂંટણી પંચે આ બંને બેઠકો માટે મતદાર યાદીની સંક્ષિપ્ત સુધારણા માટેનો કાર્યક્રમ જાહેર કર્યો છે, જે ૮ એપ્રિલથી ૨૪ એપ્રિલ સુધી ચલાવાશે. આ પ્રક્રિયા પૂર્ણ થયા બાદ ૫ મે ૨૦૨૫ સુધીમાં સુધારેલી મતદાર યાદી જાહેર થશે અને ૧૫ જૂન પહેલા પેટા ચૂંટણી યોજાવાની સંભાવના છે.
કડી વિધાનસભા બેઠક પર ભાજપના ધારાસભ્ય કરસનભાઈ સોલંકીનું ગત ફેબ્રુઆરી ૨૦૨૫માં અવસાન થયું હતું. જ્યારે વિસાવદર વિધાનસભા બેઠક પર આમ આદમી પાર્ટીના વિધાયક ભુપતભાઈ ભાયાણીએ ૨૦૨૩માં રાજીનામું આપ્યું હતું. જેથી આ બંને બેઠક ખાલી પડી છે.
૨૦૨૨માં વિસાવદર બેઠક પરથી કોંગ્રેસના પાટીદાર નેતા હર્ષદ રીબડીયાએ જીત મેળવી હતી. જે બાદ બીજા જ વર્ષ તેઓએ કોંગ્રેસ છોડી ભાજપનો દાવો સ્વીકારી લીધો હતો, જેના કારણે આપના ભુપત ભાયાણીએ આ બેઠક પર વિજય મેળવ્યો હતો. રીબડીયાએ વિસાવદરની ચૂંટણીના પરિણામને હાઇકોર્ટમાં પડકારતા, આ બેઠક પર લાંબા સમય સુધી ચૂંટણી થઈ શકી નથી. હવે કાયદાકીય ગૂંચ ઉકેલાતા, પેટા ચૂંટણીનો માર્ગ મોકળો થયો છે.
૨૦૨૨ પછી રાજ્યમાં ખંભાત, વિજાપુર, વાઘોડિયા, પોરબંદર અને માણાવદર સહિતની બેઠકો માટે પેટા ચૂંટણી યોજાઈ હતી. નવેમ્બર ૨૦૨૪માં વાવ વિધાનસભાની પેટા ચૂંટણી યોજાઈ હતી, ત્યારે વિસાવદર માટે કોર્ટ કેસ પેન્ડીંગ હોવાને કારણે ત્યાં ચૂંટણી થઈ ન હતી. હવે કડી અને વિસાવદરની પેટા ચૂંટણી યોજવા માટે ચૂંટણી પંચે તૈયારીઓ શરૂ કરી છે.
આ બેઠકો પર આગામી દિવસોમાં ચૂંટણી યોજાઈ શકે તેવા સંકેતો ચૂંટણી પંચ તરફથી મળી રહ્યા છે. કેન્દ્રીય ચૂંટણી પંચે નવા મતદારોની નોંધણી અને સુધારણા પ્રક્રિયા માટેની તારીખો જાહેર કરી છે, જે મુજબ ૮મી એપ્રિલથી ૨૪મી એપ્રિલ દરમિયાન આ પ્રક્રિયા ચાલશે. જે બાદ ૫ મે ૨૦૨૫ સુધીમાં સુધારેલી મતદાર યાદી જાહેર થશે અને ૧૫ જૂન પહેલા પેટા ચૂંટણી યોજાવાની સંભાવના છે.
રાજકીય રીતે કડી અને વિસાવદરની પેટા ચૂંટણી ભારે રસાકસીભરી રહી શકે છે. કારણ કે ભાજપ, કોંગ્રેસ અને આમ આદમી પાર્ટી ફરી એક વખત મેદાનમાં હશે. હવે, ચૂંટણી પંચની આગામી જાહેરાત પર સૌની નજર રહેશે.
