(એ.આર.એલ),મુંબઇ,તા.૧૧
મહારાષ્ટના મરાઠવાડા વિસ્તારમાં ૧ અને ૬ સપ્ટેમ્બર વચ્ચે ભારે વરસાદને કારણે ઓછામાં ઓછા ૫૩ લોકોના મોત થયા હતા અને લગભગ ૨૨ લાખ ખેડૂતોને અસર થઈ હતી. રાજ્યના રાહત અને પુનર્વસવાટ અને કૃષિ વિભાગો દ્વારા સંકલિત કરાયેલા પ્રારંભિક ડેટા અનુસાર, હિંગોલી, જાલના, છત્રપતિ સંભાજીનગર, ધારાશિવ, નાંદેડ અને પરભણી જિલ્લામાં ભારેથી અતિ ભારે અને વિનાશક વરસાદ વરસ્યો હતો, જેના કારણે ખેતીને ભારે નુકસાન થયું હતું.માહિતી અનુસાર, મરાઠવાડામાં ૨૨.૪૮ લાખ ખેડૂતોએ તેમના ખરીફ પાક અને ૧૮ લાખ હેક્ટરમાં ફેલાયેલા બગીચાને ભારે નુકસાનનો અંદાજ લગાવ્યો છે. મુખ્યમંત્રી એકનાથ શિંદેની સૂચનાને પગલે વહીવટીતંત્રે ૭.૨૦ લાખ હેક્ટર જમીનના પંચનામા (ગ્રાઉન્ડ લેવલ એસેસમેન્ટ) હાથ ધર્યા હતા, જે કુલ ૧૮ લાખ હેક્ટરના લગભગ ૩૯.૬૫ ટકા છે.પરભણી ૮૫.૫ ટકા પંચનામા પૂર્ણતા સાથે યાદીમાં ટોચ પર છે, ત્યારબાદ હિંગોલી ૬૭.૩૮ ટકા, લાતુર ૩૩.૮૨ ટકા, બીડ ૨૩.૭૮ ટકા, છત્રપતિ સંભાજીનગર ૨૦.૫૩ ટકા, જાલના ૧૫.૪૩ ટકા અને નાનડેડ ૨૩ ટકા છે. સૌથી ઓછા ૧.૨૫ ટકા ધરાશિવનું પંચનામા પૂર્ણ થયું છે.બાકીની ૧૧ લાખ હેક્ટર જમીનના પંચનામામાં વહીવટીતંત્ર હાલ વ્યસ્ત છે. સૌથી વધુ ૮૫.૫ ટકા પાક નુકસાન પરભણી જિલ્લામાં નોંધાયું છે. રાહત અને પુનર્વસન વિભાગે જણાવ્યું હતું કે આ સમયગાળા દરમિયાન ૫૩ લોકોએ જીવ ગુમાવ્યો હતો અને ૧૬ ઘાયલ થયા હતા. વરસાદના પ્રકોપમાં ૧,૨૬૯ જેટલા પશુઓ પણ મૃત્યુ પામ્યા હતા.વધુમાં, ૧૪ કોંક્રીટ અને માટીના મકાનો સંપૂર્ણપણે ધરાશાયી થયા, ૩૮૪ કોંક્રીટના મકાનો આંશિક રીતે તૂટી પડ્યા અને ૨,૪૨૩ માટીના મકાનો આંશિક રીતે તૂટી પડ્યા. આ સાથે આ કુદરતી આફતમાં ૨૭ ઝૂંપડા ધરાશાયી થયા હતા અથવા નાશ પામ્યા હતા અને ૧૮૨ ગૌશાળાને પણ નુકસાન થયું હતું. વિપક્ષે રાજ્ય સરકાર પાસે વરસાદથી અસરગ્રસ્ત ખેડૂતો અને અન્ય લોકોને તાત્કાલિક આર્થિક સહાય આપવાની માંગ કરી છે.
