કોડીનારના અંબુજાનગર ખાતે આંતરરાષ્ટ્રીય મહિલા દિનની ઉજવણી પ્રસંગે સોરઠ મહિલા વિકાસ સહકારી મંડળીની મહિલા અગ્રણીએ ગીર સોમનાથ જિલ્લામાં છડેચોક ચાલતા દારૂ, જુગારના હાટડા બંધ કરવા જિલ્લા કલેકટર દિગ્વિજયસિંહ જાડેજા સમક્ષ રડતા રડતા રજૂઆત કરતા ચકચાર જાગી છે. જિલ્લામાં સંખ્યાબંધ ઠેકાણે દેશી-વિદેશી દારૂના હાટડા ખુલ્લેઆમ ચાલી રહ્યા છે. દેશી વિદેશી દારૂની લતે ચડેલા યુવાનોના કારણે અનેક ઘર બરબાદીના પંથે જઈ રહ્યા છે. દારૂડિયા પતિના ત્રાસથી સોરઠની અનેક મહિલાઓ ત્રાહિમામ પોકારી ગઈ છે તો ૩૦ થી ૫૦ વર્ષની ઉંમરે કેટલીક મહિલાઓ વિધવા બની રહી છે ત્યારે મહિલા દિનની ઉજવણી પ્રસંગે હજારો મહિલાઓની વચ્ચે જિલ્લા કલેકટરની ઉપસ્થિતિમાં હજારો બહેનોને આત્મનિર્ભર કરનાર મોતીબેન ચાવડાએ રડતા ચહેરે દારૂના દૂષણ પર અંકુશ લાવવા માંગણી કરી હતી. જિલ્લા કલેકટરે પણ મોતીબહેનના ભાષણની વચ્ચે ઊભા થઈને સોરઠ મંડળની મહિલાઓ દ્વારા આ બાબતે જ્યારે ધ્યાન દોરાશે તો તુરત જ પગલાં લેવડાવવામાં આવશે તેવી ખાતરી આપી હતી. અત્રે ઉલ્લેખનીય છે કે કોડીનાર તથા તાલુકાના કેટલાય ગામોમાં ઠેક ઠેકાણે દેશી વિદેશી દારૂના હાટડાઓ ખુલ્લેઆમ ચાલી રહ્યા છે.
