ભાવનગર-સોમનાથ નેશનલ હાઇવે પર ભેરાઈ ચોકડી નજીક રેલવે ફાટક પાસે એક ટ્રકમાં અચાનક આગ લાગવાની ઘટના બની હતી. આ ઘટનાને પગલે સલામતીના ભાગરૂપે હાઇવે પર વાહનવ્યવહાર બંધ કરવામાં આવ્યો હતો. આગની જાણ થતાં સ્થાનિક પોલીસે તાત્કાલિક પગલાં લીધા હતા અને કોઈ અનિચ્છનીય બનાવ ન બને તે માટે હાઇવે બંધ કરી દીધો હતો. સ્થળ પર હાજર રોડ કામદારોએ આગને કાબૂમાં લેવાનો પ્રયાસ કર્યો હતો, પરંતુ આગ વધુ વિકરાળ બનતાં રાજુલા ફાયર વિભાગને જાણ કરવામાં આવી હતી. ફાયર બ્રિગેડની ટીમે ઘટનાસ્થળે પહોંચી આગ પર કાબૂ મેળવ્યો હતો. આગ લાગવાનું ચોક્કસ કારણ જાણી શકાયું નથી. લગભગ ૨૫ મિનિટ સુધી હાઇવે બંધ રહ્યા બાદ, આગ કાબૂમાં આવતાં પોલીસે વાહનવ્યવહાર ફરી શરૂ કરાવ્યો હતો. જાણવા મળ્યા મુજબ, આગ લાગેલી ટ્રક હાઇવેના નિર્માણકાર્ય સાથે સંકળાયેલા કોન્ટ્રાક્ટરની હતી. સ્થાનિક પોલીસ અને લોકોના સહયોગથી ઘટનામાં માત્ર ટ્રકને નુકસાન થયું હતું, અન્ય કોઈ જાનમાલનું નુકસાન થયું ન હતું.
