રાજુલા તાલુકામાં આવેલ ધાતરવડી ડેમની સલામતીને ધ્યાનમાં રાખીને જિલ્લા કલેક્ટરે એક મહત્વનો નિર્ણય લીધો છે. ડેમની નજીક આવેલી ત્રણ ક્વોરીઓમાં થતા બ્લાસ્ટિંગને તાત્કાલિક બંધ કરવાનો આદેશ આપવામાં આવ્યો છે. આ નિર્ણય ખેડૂતોએ કરેલા વિરોધ પછી લેવામાં આવ્યો છે. ખેડૂતોનું કહેવું હતું કે, ક્વોરીઓમાં થતા બ્લાસ્ટિંગના કારણે ધાતરવડી ડેમને નુકસાન પહોંચી રહ્યું છે. આના કારણે ડેમની સલામતી જોખમમાં મુકાઈ છે અને આ વિસ્તારના ખેડૂતોની સિંચાઈ પ્રણાલીને પણ અસર થઈ શકે છે. ખેડૂતોએ આ સમસ્યાને લઈને અનેક વખત રજૂઆતો કરી હતી, પરંતુ કોઈ નિરાકરણ ન આવતા તેઓ કલેક્ટર કચેરીએ પહોંચ્યા હતા અને આંદોલનની ચીમકી ઉચ્ચારી હતી. ખેડૂતોના વિરોધને ધ્યાનમાં લઈને જિલ્લા કલેક્ટર અજય દહીયાએ ખાણ ખનીજ વિભાગને આ મામલે તાત્કાલિક કાર્યવાહી કરવાના આદેશ આપ્યા હતા. ખાણ ખનીજ વિભાગે તપાસ કર્યા બાદ જણાવ્યું કે, ક્વોરીઓમાં થતા બ્લાસ્ટિંગના કારણે ડેમને નુકસાન થવાની શક્યતા છે. આથી, જ્યાં સુધી ડેમની સલામતી અંગેનો વિગતવાર અભ્યાસ ન થાય ત્યાં સુધી ક્વોરીઓમાં બ્લાસ્ટિંગ બંધ રાખવાનો નિર્ણય લેવામાં આવ્યો છે. આ નિર્ણયથી રાજુલા તાલુકાના ખેડૂતોમાં ખુશીની લહેર ફરી વળી છે. ખેડૂતોનું માનવું છે કે, આ નિર્ણયથી ધાતરવડી ડેમની સલામતી સુનિશ્ચિત થશે અને તેઓને સિંચાઈ માટે પૂરતું પાણી મળી રહેશે.
