મહારાષ્ટ્રના મુખ્યમંત્રી દેવેન્દ્ર ફડણવીસે કહ્યું હતું કે રાયગઢ કિલ્લા પર છત્રપતિ શિવાજી મહારાજના સ્મારક પાસે કૂતરાના સ્મારક અંગેનો નિર્ણય સંપૂર્ણ ચર્ચા-વિચારણા પછી લેવામાં આવશે. ફડણવીસે કહ્યું, ‘આ સ્મારક માટે હોલકરો (મરાઠા વંશના) એ આર્થિક યોગદાન આપ્યું હતું. તે ઘણા વર્ષોથી ત્યાં છે. દરેક મુદ્દા પર વિવાદ ઊભો કરવાની જરૂર નથી.
તેમણે કહ્યું કે તેઓ આ મુદ્દા પર વિગતવાર ચર્ચા કર્યા પછી નિર્ણય લેશે. રાજ્યસભાના ભૂતપૂર્વ સભ્ય અને કોલ્હાપુર રાજવી પરિવારના વંશજ સંભાજીરાજે છત્રપતિએ મુખ્યમંત્રીને ઐતિહાસિક સ્થળ પર શિવાજી મહારાજની સમાધિ પાસે સ્થિત કૂતરાની પ્રતિમાને દૂર કરવા વિનંતી કરી છે.
સ્મારક અંગે ફડણવીસને લખેલા તાજેતરના પત્રમાં, સંભાજીરાજેએ કહ્યું હતું કે, ‘શિવાજી મહારાજના પાલતુ કૂતરા વાધ્યા વિશે કોઈ દસ્તાવેજી પુરાવા નથી.’ આવા કોઈ પુરાવા ન હોવાથી, તે (કૂતરાના સ્મારક) કિલ્લા પર અતિક્રમણ છે, જે કાયદેસર રીતે વારસાગત રચના તરીકે સુરક્ષિત છે.
તમને જણાવી દઈએ કે રાયગઢ કિલ્લામાં એક કૂતરાનું સ્મારક છે, જેને ‘વાધ્યા’ તરીકે ઓળખવામાં આવે છે. તે છત્રપતિ શિવાજી મહારાજના સમાધિ સ્થળ પાસે આવેલું છે. આ સ્મારક શિવાજી મહારાજના કથિત પાલતુ કૂતરા વાધ્યાની યાદમાં બનાવવામાં આવ્યું હતું. જોકે, આ સ્મારક અને વાધ્યાના અસ્તીત્વ અંગે થોડો વિવાદ છે.
