છેલ્લા કેટલાક દિવસોથી ભારતીય ક્રિકેટમાં કેપ્ટનશીપનો મુદ્દો છવાયેલો છે. રોહિત શર્મા પછી ટેસ્ટ ટીમનો કેપ્ટન કોણ બનશે તે અંગે ચર્ચા ચાલી રહી છે. ઘણા નિષ્ણાતો આ જવાબદારી માટે સ્ટાર વિકેટકીપર-બેટ્સમેન ઋષભ પંતનું નામ પણ સૂચવી રહ્યા છે. આવું થશે કે નહીં તે તો આવનારા મહિનાઓમાં જ ખબર પડશે, પણ તે પહેલાં જ પંતને ટીમની કમાન મળી જશે. ફક્ત આ ટીમ ઈન્ડીયા નથી પણ દિલ્હી ક્રિકેટ ટીમની કમાન છે. હા, આ સ્ટાર વિકેટકીપરને રણજી ટ્રોફીની આગામી મેચ માટે દિલ્હી ક્રિકેટ ટીમની કેપ્ટનશીપ મળી ગઈ છે. આ મેચ માટે દિલ્હીની ટીમની જાહેરાત શુક્રવાર, ૧૭ જાન્યુઆરીના રોજ કરવામાં આવશે.
રણજી ટ્રોફીનો ગ્રુપ સ્ટેજ ૨૩ જાન્યુઆરીથી ફરી શરૂ થઈ રહ્યો છે, જેમાં ટીમ ઈન્ડીયાના કેટલાક નિયમિત ખેલાડીઓ પણ રમવાના છે. દિલ્હી વતી, પંતે એસોસિએશનના પ્રમુખને તેમની ઉપલબ્ધતા વિશે પહેલાથી જ જાણ કરી દીધી હતી. આવી સ્થિતિમાં, હવે એવું માનવામાં આવે છે કે તે ટીમનું નેતૃત્વ પણ કરશે. દિલ્હીને તેની આગામી મેચ સૌરાષ્ટ્ર સામે રમવાની છે.
અહેવાલ મુજબ, શુક્રવાર, ૧૭ જાન્યુઆરીના રોજ, દિલ્હી અને જિલ્લા ક્રિકેટ એસોસિએશનની પસંદગી સમિતિ આ મેચ માટે ટીમની જાહેરાત કરશે. અહેવાલમાં,ડીડીસીએના એક અધિકારીને ટાંકીને કહેવામાં આવ્યું છે કે પંતનું નામ આ બેઠકમાં જ અંતિમ સ્વરૂપ આપવામાં આવશે. આ સમય દરમિયાન, ૩૮ ખેલાડીઓની સંભવિત ટીમમાંથી આ મેચ માટે ટીમ પસંદ કરવામાં આવશે. હાલમાં આ ટીમની પસંદગી ફક્ત આગામી મેચ માટે જ કરવામાં આવી રહી છે. આ પછી પણ, દિલ્હીને ગ્રુપ સ્ટેજમાં તેની છેલ્લી મેચ રમવાની છે પરંતુ પંત તેમાં રમે તેવી શક્યતા નથી.
જ્યાં સુધી વિરાટ કોહલીનો સવાલ છે, અત્યાર સુધી ડીડીસીએને સ્ટાર બેટ્સમેન તરફથી કોઈ અપડેટ મળ્યું નથી. જ્યારથી પંત ઉપલબ્ધ થયો છે, ત્યારથી બધાની નજર કોહલી પર છે કે તે આ મેચ માટે પોતાને ઉપલબ્ધ કરાવશે કે નહીં. કોહલી હાલમાં મુંબઈમાં છે, જ્યાં તે અલીબાગમાં તેના નવા ઘરની હાઉસવો‹મગની તૈયારીમાં વ્યસ્ત છે. આવી સ્થિતિમાં, એવી અપેક્ષા રાખવામાં આવે છે કે કોહલી આ કાર્યક્રમ પછી જ અપડેટ આપશે.
આ અંગે ઉત્સુકતા છે કારણ કે તાજેતરમાં રોહિત શર્માએ મુંબઈની રણજી ટીમ સાથે પ્રેકટીસ કરી હતી, જેનાથી સંકેત મળ્યો હતો કે તે પણ આગામી મેચમાં રમી શકે છે. કોહલીની જેમ, ઓસ્ટ્રેલિયા પ્રવાસ પર ટીમનો ભાગ રહેલા યશસ્વી જયસ્વાલ (મુંબઈ) અને શુભમન ગિલ (પંજાબ) પણ પોતપોતાની ટીમો તરફથી રમવા માટે સંમત થયા છે.
