લગભગ ૩ મહિના પહેલા સૈફ અલી ખાન પર તેના બાંદ્રા એપાર્ટમેન્ટમાં એક વ્યક્તિએ છરીથી હુમલો કર્યો હતો. આ હુમલામાં અભિનેતાને ઘણી ઇજાઓ થઈ હતી. હુમલા પછી, સૈફ અલી ખાને તેની પત્ની કરીના કપૂર ખાન સાથે મળીને કેટલાક કઠિન નિર્ણયો લીધા, જેમાં બાળકો તૈમૂર અને જેહને પાપારાઝીની નજરથી દૂર રાખવાનો પણ સમાવેશ થાય છે. દરમિયાન, અભિનેતાએ ખુલાસો કર્યો છે કે તેણે તાજેતરમાં કતારના દોહામાં એક વૈભવી ઘર ખરીદ્યું છે. સૈફ અલી ખાનના જણાવ્યા મુજબ, તેણે દોહાના સેન્ટ રેજીસ માર્સા અરેબિયા ટાપુ, ધ પર્લ ખાતે એક નવું ઘર ખરીદ્યું છે.
અલ્ફરદાન ગ્રુપ દ્વારા આયોજિત એક પ્રેસ ઇવેન્ટમાં બોલતા, સૈફે મિલકત વિશે તેમને સૌથી વધુ આકર્ષક શું લાગ્યું તે જાહેર કર્યું. તેમણે કતારની સુરક્ષા, સુંદરતા અને ભારતથી ઓછા અંતરને પોતાના નિર્ણયના કારણો ગણાવ્યા. અભિનેતાના મતે, તે તેના પરિવાર માટે એક સંપૂર્ણ સ્થળ છે. સૈફે કહ્યું, ‘તે સલામત છે અને ઘરથી દૂર ઘર જેવું છે.’
પોતાના નવા ઘરની ખાસિયત વિશે વાત કરતાં સૈફ અલી ખાને કહ્યું, ‘રજાઓ માટે હોલિડે હોમ અથવા સેકન્ડ હોમ વિશે વિચારો. મને થોડીક વાતોનો વિચાર આવે છે. એક વાત એ છે કે તે બહુ દૂર નથી અને સરળતાથી પહોંચી શકાય છે. અને બીજું અને સૌથી અગત્યનું, તે ખૂબ જ સલામત છે અને ત્યાં રહીને ખૂબ સારું લાગે છે. ટાપુની અંદર એક ટાપુનો ખ્યાલ પણ ખૂબ જ વૈભવી અને સુંદર છે, અને તે રહેવા માટે ખરેખર એક સુંદર સ્થળ છે. જ્યારે તમે ત્યાં હોવ ત્યારે તમને જે અનુભૂતિ થાય છે તે અદ્ભુત હોય છે. સુંદર દૃશ્યો, સારું ભોજન, જીવનશૈલી અને રહેવાની ગતિ. આ કેટલીક બાબતો છે જેના કારણે મેં આ નિર્ણય લીધો છે.
અભિનેતાએ પોતાની નવી મિલકતને ‘ઘરથી દૂર એક ઘર’ તરીકે વર્ણવી. તેણે કહ્યું- ‘હું ત્યાં કોઈ કામ કરવા ગયો હતો.’ હું કંઈક શૂટિંગ કરી રહ્યો હતો અને હું તે મિલકત પર રોકાયો અને મને લાગ્યું કે તે અદ્ભુત છે. ગોપનીયતા અને વૈભવીતાનું સંપૂર્ણ મિશ્રણ, આ મને ખરેખર ગમ્યું. મારો મતલબ, મને ઘરથી દૂર ઘર જેવું લાગ્યું, તેથી તે ખૂબ જ સરળ હતું. સૌથી મહત્વની વાત એ છે કે જા તમે શાંતિપૂર્ણ સ્થળ શોધી રહ્યા છો તો આ તમારા માટે યોગ્ય સ્થળ છે. આ સાથે, સૈફે પોતાના પરિવારને, ખાસ કરીને પોતાના પુત્રો તૈમૂર અને જેહને, આ જગ્યાએ લઈ જવાની ઇચ્છા પણ વ્યક્ત કરી.
આ ઉપરાંત સૈફ પાસે બીજી ઘણી મિલકતો પણ છે. પૂર્વજાના પટૌડી પેલેસ ઉપરાંત, બાંદ્રામાં એક વૈભવી એપાર્ટમેન્ટ. હાલમાં, સૈફ તેની પત્ની કરીના કપૂર ખાન, બાળકો તૈમૂર-જેહ અને સમગ્ર પરિવાર સાથે બાંદ્રા સ્થિત તેના એપાર્ટમેન્ટમાં રહે છે. સૈફ લંડન અને ગસ્ટાડમાં પણ મિલકતો ધરાવે છે.
