સાવરકુંડલાની શ્રી એસ.વી. દોશી ગર્લ્સ હાઇસ્કૂલની વિદ્યાર્થિની શ્રેયા પંડયાએ ‘ગરવી ગુજરાત’ થીમ આધારિત જિલ્લા કક્ષાના કલા ઉત્સવમાં પ્રથમ ક્રમ મેળવી શાળાનું નામ રોશન કર્યું છે. તા. ૨-૧૨-૨૪ ના રોજ યોજાયેલ આ કલા ઉત્સવમાં શ્રેયાએ પોતાની કલાત્મક પ્રતિભાનું પ્રદર્શન કરીને ન્યાયાધીશોનું દિલ જીતી લીધું હતું. તેની આ સિદ્ધિ માટે શાળા પરિવાર અને નૂતન કેળવણી મંડળના ટ્રસ્ટીઓએ શ્રેયાને અભિનંદન પાઠવ્યા છે. શ્રેયાને આ સફળતા મળવા પાછળ પ્રિન્સિપાલ ઉષાબેન તેરૈયા, સુપરવાઇઝર નીતાબેન ત્રિવેદી અને શિક્ષક લાલજીભાઈ રાઠોડના માર્ગદર્શનનો મહત્વનો ફાળો રહ્યો છે. તેમણે શ્રેયાને સતત પ્રોત્સાહન આપીને તેની પ્રતિભાને નિખારવામાં મદદ કરી હતી. શ્રેયા હવે આગામી ૧૭-૧૨-૨૪ ના રોજ જૂનાગઢ ખાતે યોજાનાર ઝોન કક્ષાના કલા ઉત્સવમાં ભાગ લેશે.
