પંજાબના અમૃતસરમાં ઈસ્લામાબાદ પોલીસ સ્ટેશન નજીક મંગળવારે વહેલી સવારે એક જોરદાર શંકાસ્પદ વિસ્ફોટ સંભળાયો. જણાવવામાં આવી રહ્યું છે કે સવારે લગભગ ૩ વાગે આ વિસ્ફોટના અવાજથી લોકો જાગી ગયા હતા. વિસ્તારના લોકોમાં ગભરાટ ફેલાયો હતો.
ઈસ્લામાબાદ પોલીસ સ્ટેશનના અધિકારી જસબીર સિંહે કહ્યું કે અમે પણ અવાજ સાંભળ્યો, પરંતુ પોલીસ સ્ટેશનમાં કોઈ વિસ્ફોટ થયો ન હતો. આ પછી એ જાણવામાં આવી રહ્યું છે કે વિસ્ફોટ ક્યાં થયો હતો? સ્થાનિક પોલીસ અધિકારીઓ આ બાબતે કંઈ કહેવા તૈયાર નથી.
દરમિયાન, ગેંગસ્ટર જીવન ફૌજીએ આ વિસ્ફોટની જવાબદારી લીધી છે. સ્થાનિક લોકોનું કહેવું છે કે વિસ્ફોટ લગભગ ૩ વાગે થયો હતો. વિસ્ફોટ એટલો જોરદાર હતો કે ઘરની અંદરની દિવાલ પરની તસવીર પણ પડી ગઈ હતી. જો કે, હજુ સુધી પંજાબ પોલીસે વિસ્ફોટની જવાબદારી લેનાર ગેંગસ્ટર વિશે કંઈપણ પુષ્ટિ કરી નથી.
છેલ્લા ઘણા દિવસોથી પંજાબમાં પોલીસ સ્ટેશનો પાસે આવા જ બ્લાસ્ટ કરવામાં આવી રહ્યા છે. પોલીસ સ્ટેશન નજીક બ્લાસ્ટની આ છઠ્ઠી ઘટના છે. ૪ ડિસેમ્બરે અમૃતસરના મજીઠા પોલીસ સ્ટેશનમાં બ્લાસ્ટ થયો હતો. તાજેતરમાં અજનાલા પોલીસ સ્ટેશનની બહાર એક આઇઇડી પણ મળી આવ્યો હતો. અમૃતસર પોલીસ કમિશનરેટની ગુરબક્ષ નગર પોલીસ ચોકીની અંદર પણ બ્લાસ્ટ થયો હતો.
